Премьер-Министр Олжас Бектенов заңсыз импорттың алдын алу үшін заңдағы олқылықтарды жоюды және «көлеңкелі» импортқа жол бермеу үшін бірқатар шараларды қабылдауды тапсырды, деп хабарлайды aqshamnews.kz
Үкімет басшысы бейінді министрліктерге тауарлардың бірнеше каталогтарын сараптап, олардың артықтарын жоюды міндеттеді. Бұл қадам өнімді бір каталог арқылы импорттап, басқа каталогпен отандық өнім ретінде өткізуге мүмкіндік беретін заңсыз схемаларды болдырмауға бағытталған.
Қаржы министрлігі халықаралық стандарттарды ескере отырып, мемлекеттік сатып алуды жүзеге асыру үшін Тауарлардың электрондық каталогын жасаған. Енді Қаржы министрлігі Сауда министрлігімен және басқа да мүдделі мемлекеттік органдармен бірлесіп, артық каталогтарды жоюға жауапты болады.
Сонымен қатар, Премьер-Министр Қазақстанда отандық өнімдер бола тұра, импорттық тауарларды сатып алу тәжірибесін тоқтату қажеттігін атап өтті. Ол Өнеркәсіп министрлігіне мемлекеттік органдармен және ұйымдармен бірлесіп, отандық шикізат пен материалдарды пайдалану бойынша ірі мердігер компаниялардың міндеттемелеріне мониторинг жүргізудің тиімді тетігін әзірлеуді тапсырды.