Әзербайжан президенті Ильхам Алиев Azerbaijan Airlines әуе компаниясының экипаж мүшелерінің отбасылары мен апаттан аман қалған бортсеріктермен кездесуінде ел азаматтарының қазасы туралы пікір білдірді, деп хабарлайды aqshamnews.kz
Minval басылымының хабарлауынша, Алиев кінәлілерді жазалауды талап еткен.
«Біз әділдік орнап, кінәлілердің жазалануын, барынша ашықтық пен адамгершілік қарым-қатынасты талап етеміз. Жақын арада алдын ала нәтижелерді білетінімізге және барлығы өз орнына келіп, трагедияның толық көрінісі анықталатынына сенімдімін. Бұл қайғылы оқиғаны толық зерттеу мен кінәлілерді жазалау ісінде маңызды кезең болады», — деді Әзербайжан президенті.
Әзербайжан басылымының хабарлауынша, егер Грозный дер кезінде әуе кеңістігін жапса және РФ әскери мен азаматтық қызметтері арасында үйлестіру болғанда, трагедияның алдын алуға болар еді.
Ильхам Алиевтің айтуынша, егер Ресей апат болған алғашқы сәттерден объективті тергеу жүргізуге ұмтылғанда, Әзербайжан қара жәшіктерді Тәуелсіз мемлекеттер достастығының авиация комитетінде (МАК) расшифрлеуге келісер еді.
Алайда, «апаттың мән-жайын жасыру және ұшақтың «құстармен соқтығысу» немесе «борттағы оттегі баллонының жарылуы» деген талпыныстар» МАК тарапынан тергеудің объективтілігіне күмән тудырған. Бұл президенттің де, қоғамның да наразылығын тудырды.