"Менің Қапшағай су қоймасы мен Іле өзенінің жағалауында заңсыз берілген 82 жер учаскесіне қатысты арызыма сәйкес, ҚР АШМ Жер ресурстарын басқару комитеті Алматы облысының Жер ресурстарын басқару департаментіне жоспардан тыс тексеру жүргізу туралы тапсырма жолдады!" - делінген жазбада.
Депутаттың айтуынша, Қапшағай су қоймасы мен Іле өзенінің су қорғау белдеулерінде орналасқан 82 жер учаскесі жеке және заңды тұлғалардың меншігіне рәсімделіп кеткен. Ал мұндай жерлерді жекешелендіруге заңмен тыйым салынған.
Жер кодексі мен Су кодексі бойынша, су қорғау аймақтары мен ерекше қорғалатын табиғи аумақтар (ЕҚТА) айналымға шығарылмауы тиіс. Бірақ ЕГКН базасында бұл учаскелер жеке меншік ретінде тіркелгені анықталды.
"Нәтижесінде қарапайым халық Капшағай су қоймасы мен Іле өзенінің арнасына еркін өте алмай отыр. Су жағалауы бетон дуалдармен қоршалған. Бұл – азаматтардың су ресурстарына еркін қол жеткізу құқығын өрескел бұзу", - деп жазды Бақытжан Базарбек.
Депутат Бас прокуратураға, Ауыл шаруашылығы министрлігінің Жер ресурстарын басқару комитетіне және Су ресурстары және ирригация министрлігіне ресми түрде өтініш жолдағанын айтты.