Іле ауданының әкімі Бағдат Қарасаевтың заңсыз әрекеттері аймақ экологиясына 204 миллион теңге көлемінде зиян келтірген. Бұл туралы Антикорупция агенттігінің ресми өкілі Данияр Бигайдаров ведомствода өткен брифингте мәлімдеді, деп хабарлайды aqshamnews.kz.
4 қыркүйек күні таңертең Антикор әлеуметтік желілерде тараған Іле ауданы әкімі ұсталды деген ақпаратты растады. Алматы облысы прокуратурасы әкімнің заңсыз кәсіпкерлік қызметке қатысқаны және өкілеттігін асыра пайдаланғаны туралы күдікке ілінгенін айтты.
«Ол сенімді басқару құқығын өзіне жақын компанияға заңсыз түрде беріп, қатты тұрмыстық қалдықтарды басқару полигонын басқартқаны үшін күдікке ілініп отыр», – деп мәлімдеді Бигайдаров.
Тергеу мәліметінше, әкім полигонды сенімді басқару мерзімін заңсыз ұзартқан. Шенеунік өзінің қылмыстық схемасына ауданның қаржы және тұрғын-үй коммуналдық шаруашылығы бөлімдерінің басшыларын тартқан.
«Келісімшарт бойынша қатты тұрмыстық қалдықтарды өңдеу міндеттемелері орындалмаған, ал компаниядан түскен табыс оның жеке байытуына бағытталған», – деп атап өтті агенттіктің ресми өкілі.
Соттың санкциясымен күдікті қамауға алынды.