ҚазНИИОР радиология және ядролық медицина бөлімінің меңгерушісі Жандос Аманқұлов ядролық медицинаның заманауи әлемде, әсіресе, онкология саласында маңызды орын алатынын атап өтті.
Жандос Аманқұловтың айтуынша, радиоактивті изотоптарды пайдалану арқылы жүргізілетін технологиялар ауруды ерте кезеңдерде анықтап қана қоймай, тиімді емдеуді де жүзеге асыруға мүмкіндік береді, сонымен қатар сау тіндерге әсерін мейлінше азайтады.
– Ядролық медицинаның маңызды бағыттарының бірі – диагностика. Радиоизотоптық диагностика ішкі ағзалар мен тіндерді және олардың патологияларын жоғары дәлдікпен визуализациялауға мүмкіндік береді, бұл өз кезегінде тиімді емдеу әдістерін уақтылы қолданудың ықтималдығын арттырады. Мысалы, позитрондық-эмиссиялық томография компьютерлік томографиямен бірге ісіктің суретін алуға және оның метаболикалық белсенділігін бағалауға мүмкіндік береді. Бұл, әсіресе, онкологияда маңызды, өйткені емдеудің сәттілігі көбінесе аурудың ерте анықталуы мен оның сатысын дәл анықтауға байланысты, – деді Жандос Аманқұлов.
ҚазНИИОР деректеріне сүйенсек, елдегі қатерлі ісік ауруларының деңгейі әр 100 мың адамға 200-ден астам жағдайды құрайды. Тек өткен жылы 44 909 жаңа жағдай тіркелген.
– Ядролық медицинаны онкологиялық ауруларды диагностикалау және емдеуде қолдану пациенттердің болашағын айтарлықтай жақсартады. Бұл бағытты дамыту, жаңа технологияларға инвестиция салу және мамандарды даярлау өте маңызды, осылайша еліміздің әрбір азаматы жоғары сапалы медициналық көмекке қол жеткізе алады, – деп қорытындылады Жандос Аманқұлов.