Бұл жолғы бағыт-бағдардың мәнін Президентіміз Аmanat партиясының кезектен тыс ХХІІІ съезінде сөйлеген сөзінде былайша тиянақтады: «Жаңа Қазақстан дегеніміз – шын мәнінде Әділетті Қазақстан». Бұл туралы Мемлекет басшысы халыққа арнаған Жолдауында да бірнеше рет атап көрсеткен.
Әділетті Қазақстан. Қысқа да нұсқа, тамаша анықтама! Жемқорларға, заңды белден басушыларға ұнай қоймас, ал мен үшін көктен іздегенім жерден табылғандай болды. «Әділетті» сөзінің бірнеше синонимі бар: «Әділет», «Әділеттілік», «Әділдік». Бәрінің түбірі бір сөз – әділ. Осынау сөзді кезінде хакім Абай да молынан қолданған екен. Әділ жан тентекті де тыятынын, дұшпанына да қиянат жасамайтынын өлеңмен өрнектепті. Абай «Әділетті» сөзін бірде хақтың жолы деп білсе, келесіде ерлік мағынасында қолданады. Мұндағы хақ – Құдай, ал ерлік дегені, ғұламаның сөзімен айтсақ, «әділетті ақыл мойындаған нәрсені, қиын да болса мойындау».
Иә, бүгінгі Қазақстан үшін әлеммен бәсекелесуден бұрын, хақ жолына түсу маңыздырақ болып тұр. «Ұрлық түбі – қорлық», «Өтіріктің арты бір тұтам» екеніне көзіміз әбден жетті. Өтірік пен ұрлық бір жыл, екі жыл емес, ондаған жыл бойы қоғамымызды обырдай жеген екен. Енді, міне, Тұңғыш Президенттің мәртебесіне, Конституцияға қатысты мәселелерді қалай шешерімізді білмей отырған жайымыз бар.
«Кім – кімді?» сұрағымен бетпе-бет келдік. Мұндайда батыл да бастамашылдықпен қимылдағандар ғана жеңіске жетеді. Қаңтардағы бүлік тұсында Қ.Тоқаев қалай ерен батырлық көрсетсе, енді бүгін одан он есе ірі ерлік пен қаһармандық керек. Жартыкеш шешім мен әрекет жарға соқтырады. Тәуелсіздік дұшпандарының күткені де сол. Қолы таза, ақыл-ойы сергек әрі жаужүрек жігіттерді жұмылдырғаннан басқа жол жоқ.
Әділетті Қазақстанды адал да әділ жандар ғана құра алады. Әділет салтанат құрғанына көзі жеткен сәттен халықтың жасампаз бұла күші сыртқа шығады. Билік сол құлшынысқа сай болса, әлемдік бәсеке биігінен көрінеріміз сөзсіз. Халық пен билік және зиялы қауымның әділдікке құрылған одағына ешқандай қара ниетті күш қарсы тұра алмайды.