Цифрлық даму, инновациялар және аэроғарыш өнеркәсібі министрлігінің Информациялық қауіпсіздік комитетінің төрағасы Руслан Абдикаликов елімізде Халыққа қызмет көрсету орталықтарының толық жабылуы туралы тараған ақпаратты жоққа шығарды, деп хабарлайды aqshamnews.kz
Оның айтуынша, ХҚКО-ды жабудың ешқандай қажеттілігі жоқ. Азаматтар көріп отырған ХҚКО жұмысын тек «фронт-офис» деп атауға болады, яғни бұл азаматтардың ХҚКО-ға барып, қызметкерлермен тікелей қарым-қатынас жасайтын бөлімдер. Алайда ХҚКО – бұл тек қызмет көрсету залдары ғана емес. Мұнда көпшілік көрмейтін, күнделікті әкімшілік жұмыстарды атқаратын қызметкерлер де бар.
«Банктерде немесе басқа да онлайн сервистерде кейбір мемлекеттік қызметтер қолжетімді болғанымен, бұл ХҚКО-лардың қажеттілігін жою дегенді білдірмейді. Банктер өздерінің клиенттерінің деректерімен ғана жұмыс істейді, ал елімізде 20-дан астам банк бар. Егер мемлекеттік деректердің біртұтас қоймасы болмаса, банктік қосымшаларды пайдалану азаматтар үшін ыңғайсыз болады», – деді Руслан Абдикаликов.
Ол сондай-ақ, ХҚКО-тарды жабу жөніндегі бастама қазіргі уақытта қарастырылып жатқан жоқ екенін атап өтті.