Алуа ЖОЛДЫБАЛИНА, ҚСЗИ директорының орынбасары:
Биыл наурыз айында «Қазгидромет» орталығы Қазақстанның қай аймақтарында су тасқыны қауіпі бар екенін болжаған болатын. Барлық аймақтар қатері жоғары өңірлер (10 аймақ), қатері орташа аймақтар (6), қатері төмен өңір (1 облыс) деп бөлінген еді. Сол уақыттан бері халықтың да, мемлекеттік органдардың да дайындық жұмыстарына қарамастан су тасқынының көлемі де, зардабы да азаяр емес.
Қазіргі уақыттағы ең басты 2 міндет: біріншіден, адам шығынын болдыртпау, адамдардың қауіпсіз аймаққа көшуін тез әрі тиімді ұйымдастыру. Екіншіден, зардап шеккен аймақтарға тамақ, киім-кешек тұрғысынан шұғыл көмек көрсетіп, өмір сүру жағдайларын жақсарту.
Осындай жағдайда барлық азаматтар да, бизнес те, жекелеген ұйымдарда да жұмылып, шама келгенше көмек көрсетуі тиіс.
Еріктілердің мәлімдеуінше, кейінгі уақытта жұмыс өте күшейген, себебі халық қайырымдылық жасауға өте белсенді қатысуда. Көмек қабылдау орталықтары күндіз-түні жұмыс істеуде. Осының бәрі халық әрдайым бірлік пен жанашырлық ұстанымында әрекет ететінің көрінісі.
Келешекте қуаңшылық пен өрт, су тасқыны деген секілді апаттар алдын алуда, ықтимал табиғи, технологиялық қауіптердің бәрі ескеріп, саралайтын тәуекелдерді басқару орталығын құру да өте маңызды болып көрінеді.