10 тамыз қазақ халқының ұлы ақыны, ойшылы әрі ағартушысы Абай Құнанбайұлының туған күніне орай Алматы қаласында бірқатар рухани-мәдени іс-шаралар өтіп жатыр. Бүгін, 10 тамыздағы мәдени-рухани шаралар легі Абай ескерткішіне тағзым етіп, гүл шоқтарын қоюдан басталды. Дәстүрлі шара қала орталығындағы Абай алаңында ұйымдастырылды.
Шараға зиялы қауым өкілдері, қала әкімдігі, Мәслихат депутаттары, қоғамдық кеңес мүшелері, белсенді жастар мен қала тұрғындары қатысты. Жиналған қауым ақын рухына тағзым етіп, ескерткішке гүл шоқтарын қойды.
Шара аясында Н.Тілендиев атындағы Мемлекеттік академиялық фольклорлық-этнографиялық «Отырар сазы» оркестрінің сүйемелдеуімен жиналған жұрт Ұлы Абайдың рухы алдында бас иіп, оның өшпес мұрасын тағы бір еске алу мақсатында «Көзімнің қарасы» әнін шырқады.
Абай Құнанбайұлы – қазақ әдебиеті мен руханиятының шамшырағы. Оның қалдырған мол мұрасы мен даналыққа толы ой-толғаулары бүгінгі қоғам үшін әлі де өзекті. Бұл күн – тек ақынның туған күнін еске алу ғана емес, ұлттың рухани жаңғыруына бағытталған маңызды белес.
"Абайды тануымыз жыл сайын тереңдеп келеді, біз жыл сайын Абайға жақындап келе жатырмыз. 180 жылдық Қазақстанның түкпір-түкпірінде, оның ішінде алтын шаһар – Алматыда айрықша аталып жатыр. Біз Абайды таныған сайын халқымызды танып қана қоймай, жұртымыздың кемшілігін көреміз. Бүгінгі Алматы қаласының әкімдігі соған жағдай жасап отыр. Құрметті қауым, Абай тойы құтты болсын, бұл мерейтой тарқамасын", – деді жазушы, Қазақстанның еңбек сіңірген қайраткері Смағұл Елубай.
Сайран ЖАНТӨРЕЕВА, «Гранд Ана» тобының жетекшісі:
"Бүгін керемет мереке! Абай атамыздың 180 жылдығын тойлап жатырмыз. Бұл біздің қатысып отырған үшінші іс-шарамыз. Шараның ұйымдастырылуы өте жоғары деңгейде! Қазақ жастарына үлгі болу үшін бүгін міне, қазақи нақышта киіндік", – деді.
Қала жұртшылығы белсенді түрде Абай мерейтойын атап өтуде. Бүгін Абай алаңына 5000-ға жуық адам жиналып, хакімнің әнін шырқады. Рухани шара елдің еңсесін биіктетіп, Абай аманатын қайта ой елегінен өткізуге мүмкіндік бергені анық.