Энергетика министрлігі Атом энергетикасы және өнеркәсібі департаментінің директоры Ғұмар Серғазиннің айтуынша, Қазақстанда АЭС салу уақыты әлдеқашан жеткен.
"Бізге негізі АЭС-ті баяғыда-ақ салу керек еді. Енді салмау күнә", – деп ол МАГАТЭ ұйымының мамандарының пікіріне сүйене отырып мәлімдеді.
Серғазиннің айтуынша, АЭС салуға барлық алғышарттар бар: шикізат қоры жеткілікті, өндіріс жоғары деңгейде дамыған, ғылыми әлеуетіміз көптеген дамыған елдерден алда. Егер АЭС салу туралы шешім қабылданса, Қазақстанның энергетикалық жетістігі одан әрі дами түсетініне сенімді. Үміткер төрт компанияның біреуімен келісімге қол қойылса, алдағы он жылда қазақстандық мамандар шетелдік атом электр станцияларында тәжірибе жинақтайтын болады.
"Мен өзім Оңтүстік Корея, АҚШ, Белорусь сынды елдердің атом станцияларында болдым. Экскурсия кезінде олардың тарихымен танысып, АЭС орналасқан жердегі ауылдардың кейін үлкен қалаларға айналғанын көрдім. Сол сияқты ертең Үлкен ауылы да үлкен қалаға айналарына күмәнім жоқ", – деді Ғұмар Серғазин.