Арай Сабыржан шет елдерде жастар кеңесін құру, қазақ бизнесін ілгерілету жайында сөз қозғады
Бүгін Астана қаласында әлемнің 40 мемлекетінен келген 200-ге жуық қандастың басын қосқан Отандастар форумы өтіп жатыр, деп хабарлайды аlmaty-akshamy.kz Halyq Uni-не сілтеме жасап.
Отандастар форумына АҚШ-тан арнайы келген Google компаниясының қызметкері Арай Сабыржан бүгінде АҚШ-та тұратын қазақтар саны 100 мыңнан асатынын айтып, шетелде жастар кеңесін құру (экспатриант) қажет екенін жеткізді. Сондай-ақ шетелдегі экспаттарды елге тарту алгоритмін әзірлеуді ұсынды.
«Қазақстандағы бос жұмыс орындары, инвестиция және білім беру мүмкіндіктері туралы өзекті ақпаратты таба алатын ақпараттық платформалар мен ресурстарды құру. Сонымен қатар шетелдегі қазақ ұйымдарының құрылымдық негізін күшейтіп, шетелде жүрген қазақстандықтардың мүддесін көрсете алатын кәсіби қауымдастықтар мен бірлестіктер құруға қолдау көрсету қажет», - деді ол форумының ашылуында сөйлеген сөзінде.
Бұған қоса, Арай Сабыржан отандастарды біріктіре алатын және оларға қажетті сараптамалық көмек көрсете алатын диаспораларға беделді көшбасшыларды іздеу және қолдау қажет деп есептейді.
Жобаларды табысты жүргізу және гранттар алу үшін отандастардың заңгерлік және консультациялық қызметтерге қол жеткізуін қамтамасыз етуге күш салу. Қазақстанда жобаларды іске асыру үшін қажетті дағдыларды дамыту мен гранттарды тарту үшін мамандандырылған Білім беру бағдарламалары мен курстарын құру, - деп толықтырды сөзін.
Сондай-ақ Арай Сабыржан мәдени және білім беру бағдарламаларын кеңейтуге қатысты ұсыныс айтты.
Ол - отандастарға қазақ мәдениетін, тарихын және тілін үйренуге мүмкіндік беретін түрлі білім беру курстары мен іс-шараларын дамыту. Дәстүрлі оқыту әдістеріне қосымша онлайн курстар сияқты инновациялық тәсілдерді енгізу. Шетелде қазақ мәдениеті мен өнерін насихаттауға ықпал ететін мәдени зерттеулерді, сондай-ақ жасанды жобаларды қолдау керек, - деді А.Сабыржан.
Тағы бір ұсыныс – қазақ бизнесін ілгерілету мен Атажұртпен байланысты нығайту.
«Шетелде өз қызметін кеңейтуді қалайтын қазақстандық кәсіпкерлер мен стартаптар үшін платформалар мен инкубаторлар құрып, бизнес-қоғамдастықты қолдау және халықаралық кәсіпкерлік бойынша кеңес беру. Отандастар мен Қазақстанның мемлекеттік институттары арасында тікелей байланыс орнату үшін ақпараттық ресурстар мен платформалар жүйесін әзірлеу. Диаспора өкілдері мен қазақстандық билік арасындағы диалог үшін тұрақты іс-шаралар мен кездесулерді ұйымдастыру керек деп есептейміз», - деді Арай Сабыржан.