Алматыда 69 адам Гонгконг тұмауын жұқтырған. Алматы Денсаулық сақтау басқармасы мектептер қашықтан оқытыла ма деген сұраққа жауап берді, - деп хабарлайды aqshamnews.kz тілшісі.
Бұл туралы Алматы қаласы Санитариялық-эпидемиологиялық бақылау департаменті басшысының орынбасары Әсел Қалықова мәлімдеді.
Оның айтуынша, қазір қаладағы ешбір мектепте оқушылар арасындағы сырқаттану көрсеткіші белгіленген шекті деңгейден аспаған.
"Бүгінгі жағдай бойынша, ЖРВИ-ге қатысты оқушылар арасында сырқаттану көрсеткіші белгіленген шекті деңгейден асқан жоқ. Бас мемлекеттік санитариялық дәрігердің қаулысына сәйкес, онлайн оқуға көшу тек жеке сыныптар бойынша қарастырылады, бүкіл мектеп бойынша емес", – деді маман.
Оның сөзінше, онлайн форматқа ауысу үшін ЖРВИ немесе тұмау жұқтырған оқушылар саны 30 пайыздан асуы керек. Қазіргі Алматыдағы ешбір мектепте мұндай жағдай тіркелмеген.
"Балабақшалар бойынша да жағдай бақылауда. Алматы қаласы бойынша уақытша жабылған бірде-бір балабақша жоқ", – деп жеткізді спикер.
Ол қаладағы эпидемиологиялық жағдай мониторингтің тұрақты жүргізіліп отырғанын, барлық білім беру ұйымдарында таңертеңгі сүзгі мен профилактикалық шаралар жалғасып жатқанын атап өтті.
Еске салайық, Алматыда 69 адам Гонгконг тұмауын жұқтырған.