Алматыда Қазақстанның бірыңғай уақыт белдеуіне көшу мәселесіне арналған ғылыми талқылау өтті. Сәтбаев университетінде ұйымдастырылған дөңгелек үстелді ҚР Ғылым және жоғары білім министрлігі өткізді, деп хабарлайды aqshamnews.kz
Іс-шараға 40-тан астам маман қатысты. Олардың қатарында ҚР Ғылым және жоғары білім министрлігі мен ҚР Денсаулық сақтау министрлігінің өкілдері, жоғары оқу орындарының басшылары, ғылыми-зерттеу институттарының мамандары, медицина және психология саласындағы қазақстандық сарапшылар, сондай-ақ қоғамдық денсаулық сақтау және мемлекеттік басқару саласындағы мамандар болды.
Қазақстанда бірыңғай уақыт белдеуіне көшу мәселесі қоғамда түрлі пікірлер тудырды. ҚР Ғылым және жоғары білім министрі Саясат Нұрбек форумның ашылуында бұл тақырыпты ғылыми тұрғыдан қарастырудың маңыздылығын атап өтті:
«Біз бұл мәселені нақты ғылыми зерттеулер тұрғысынан талқылау үшін жетекші ғалымдарымызды жинадық. Басты назарымыз – ұлт денсаулығы», – деді ол.
Министрдің айтуынша, бұл өзгерістің ересектер мен балалар денсаулығына әсерін анықтау үшін ғылыми қауымдастықтың пікірін тыңдау маңызды.
Кеңестік кезеңнен бері Қазақстанда «декреттік уақыт» қолданылып келді, ол табиғи күн тәртібінен ауытқуды тудырды. Бұл жағдай адам ағзасына кері әсер етіп, мелатонин гормонының жеткіліксіз бөлінуіне себеп болды. Ғалымдардың айтуынша, бұл гормонның жетіспеушілігі созылмалы аурулар мен онкологиялық дерттердің көбеюіне ықпал етті.
Шығыс Қазақстан және Павлодар облыстарындағы табиғи күн тәртібіне сәйкессіздік денсаулық көрсеткіштеріне теріс әсер еткені зерттеулерде айтылды. Сондай-ақ, бұрынғы уақыт белдеуінде мектеп оқушыларының ұйқысы жетіспеушілікке ұшырағаны аталып өтті.
Астрофизиктер мен географтардың айтуынша, Қазақстан аумағының басым бөлігі табиғи түрде бір уақыттық белдеуде – UTC+5 аймағында орналасқан. Бұл халықтың табиғи биологиялық ырғақпен өмір сүруіне қолайлы жағдай жасайды.
Форумда Қазақстанның бірыңғай уақыт белдеуіне көшуінің экономикалық және әлеуметтік тиімділігі де талқыланды. Мысалы, Қытай мен Еуропаның 33 мемлекеті бірыңғай уақыт белдеуін қолданады және бұл елдерде экономика табысты дамып отыр.
Дөңгелек үстел қорытындысы бойынша бірыңғай резолюция дайындалып, мемлекеттік органдарға ұсынылмақ. Сонымен қатар, бұл құжат жұртшылыққа да жария етіледі.
Қазақстанның бірыңғай уақыт белдеуіне көшуі – елдің әлеуметтік, экономикалық және денсаулық сақтау салаларында оң өзгерістер әкелуге бағытталған маңызды қадам. Бұл бастама табиғи өмір ырғағына оралу арқылы қоғамның өмір сапасын жақсартуды көздейді.