Бұл сорт вилт ауруына төзімділігімен ерекшеленеді.
Түркістан облысында "Мақтаарал-5027" атты жаңа мақта сұрпы белсенді түрде енгізіліп жатыр, деп хабарлайды aqshamnews.kz Ауыл шаруашылығы министрлігіне сілтеме жасап.
"Мақта және бақша ауыл шаруашылығы тәжірбие станциясы" ғалымдары шығарған бұл сорт ерте пісетін топқа жатады, өскіннен бастап алғашқы қауашақтың ашылуына дейін 115–117 күн уақыт кетеді.
"Өнімділігі гектарына 43,4 центнерге дейін жетеді. Сорт вилт ауруына төзімділігімен ерекшеленеді, ауруға шалдығу деңгейі тек 0,1% құрайды", - деп жазылған хабарламада.
"Мақтаарал-5027" сорты талшығының шығымы 37–38%, ұзындығы 33,5–33,7 мм. Бұтасы конус тәрізді, жайылмалы емес, биіктігі 120–125 см. Қауашақтары дөңгелек, сәл бұдырлы, бес жапырақты, жақсы ашылады және пісіп-жетілгенде түспейді. 1000 тұқымның салмағы 122,5–124,2 грамды құрайды.
Аталмыш сорт мақта көбелегі мен карадринаға төзімді. Сонымен қатар тыңайтқыштарға бейімделген, кеш суаруға төзімді және механикалық жинауға ыңғайлы.