«Nomad Stunts» қазақстандық командасының каскадері Ғалымбек Қаратүрік Үндістандағы кинофестивальде бірінші орынды иеленді, деп хабарлайды аlmaty-akshamy.kz.
Үндістанда өтіп жатқан «Атвикваруни» халықаралық байқауына әлемнің түкпір-түкпірінен 240-тан астам кино қатысты. Ал осыншама фильм арасынан отандасымыздың лентасы «үздік шетелдік фильм» номинациясы бойынша жеңімпаз атанды.
Кинофестивальде ұсынылған Картина Ғалымбек Қаратүріктің нағыз туындысы. Ол түсірілген фильмнің режиссері әрі рөлдердің бірінде ойнады. Осылайша каскадердің нағыз шеберлігін көпшілікке паш етті.
Ол қазір еліміздегі Ұлттық өнер университетінің студенттеріне өзінің бай тәжірибесімен бөлісуде. Ол жақын арада бірнеше қысқаметражды және толықметражды фильмдер шығаруды жоспарлап отыр.
«Кәсіби деңгейімді тексеру, сондай-ақ оны одан әрі дамыта түсу мақсатында халықаралық кинофестивальге қатыстым. Мен үшін бұл сәтті жоба болды деп айта аламын. Фильм туралы айтатын болсақ, әр халықтың «күңгірт жарық» философиясы бар», - дейді Ғалымбек Қаратүрік.
Оның пікірінше, біздің халқымыздың философиясы табиғатпен етене байланысып жатуында екенін фильмнің сценарий авторы және режиссері ретінде айтып өтті.
«Бұл картинаға мен 7 жыл бойы жұмыс істеп келе жатқан «Nomad Stunts» халықаралық жобасының каскадерлері де қатысты», - деп атап өтті Ғалымбек Қаратүрік.
Айта кету керек, қазақстандық каскадерлік топ әлемдегі ең үздіктердің бірі болып танылды. «Томирис» фильміндегі трюктері үшін «Nomad Stunts» «Таурус» сыйлығына ие болды. Бұл беделді марапат каскадерлік «Оскар» деп аталады.