Euronews хабарлауынша, орталық Францияда табиғи апат үлкен шығын әкеліп, халықты жарықсыз қалдырды. Италияда да қауіптілік деңгейі жоғары, қызыл деңгейдегі ескерту жарияланған, деп хабарлайды aqshamnews.kz.
Өңірлерді су басу қаупі әлі сейілмеген.
Француз метеорологтарының айтуынша, соңғы 48 сағатта оңтүстіктегі Ардеш және Лозер департаменттерінде 700 миллиметрге дейін жауын-шашын түскен. Екі күндік жауын-шашын орталық Францияда соңғы 40 жылдағы ең ірі су тасқынына алып келді. Қазіргі уақытта тұрғын үйлер мен инфрақұрылымды тазалау жұмыстары басталған.
Франция премьер-министрі Мишель Барнье климаттың өзгеруі адамзатты түрлі тәуекелдер мен апаттарға жиі ұшырайтынын атап өтті.
«Бұл дағдарыстардың барлығын, мысалы, теңіз апаттары, өнеркәсіптік апаттар, цунами, жер сілкіністері, ірі су тасқындары, пандемиялар және терроризм қауіптері сияқты — бәрін де алдын ала болжауымыз керек. Бұл мәселелерге еуропалық деңгейде дайындалу қажет», — деді ол.
Франция премьері FR Alerte дабыл жүйесіне жоғары баға берді.
Италияда да бүкіл ел бойынша қызыл деңгейдегі ескерту жарияланды. Қатты жауған жауынның арты елде лайлы су тасқындарын тудырды. Ең көп зардап шеккен аймақ — Эмилия-Романья. Болон қаласында тасқын автокөлікті ағызып кетті. Көлік ішінде бала болған.
Тосканадағы Эльса өзені мен Сицилиядағы Сальсо өзендері арнасынан көтерілген. Сондықтан жергілікті тұрғындарға мүмкіндігінше үйден шықпауға кеңес берілген.