Желіде 10 жастағы Ықыластың сүйікті "Қайрат" клубының формасын қара жейде мен скоч арқылы өзі жасап жатқан видеосы тарады. Түркістандық балақайдың жанкүйерлігіне бүкіл ел тәнті болды. Ықыластың анасы Бақытгүл aqshamnews.kz тілшісіне эксклюзив сұхбат берді.
"Форма әперіңдер" деп сұрамады"
Ықылас – 5-сынып оқушысы. Ол тарихи матч алдында ата-анасынан форма сұрамай-ақ, сүйікті командасы "Қайраттың" жейдесін қолдан жасап шықты. Анасы Бақытгүлдің айтуынша, ұлы дүкенге барып сары түсті скоч сатып алып, қара футболкаға өз қолымен жапсырған.
"Балам бізден "жейде әперіңдер" деп сұрамады. Өзі ойлап тауып, жасап шықты. Бізге де тосынсый болды", – дейді ол.
Футболға деген отбасылық махаббат
Ықыластың әулетінде футболға деген махаббат ерекше. Әкесі де, ағайындары да кезінде спортпен айналысқан. Ал баланың кумирі – Дастан Сәтпаев.
"Ұлым бала кезден футболға әуес. Дастан Сәтпаевтың әр қимылына мән береді, оның жанкүйері", – дейді анасы.
Армандарға апарар жол
Қарапайым скочтан жасалған форма – үлкен арманның бастауы. Кішкентай жанкүйердің еңбегі бүкіл елдің назарын аударып, көптің жүрегін жылытты.