Финляндиядағы "Яхтяри" зообағында өмір сүріп жатқан екі алып панда Қытайға қайтарылады.
Пандалар 2018 жылдан бері осы зообақта тұрып келеді, оларды Қытай Халық Республикасының төрағасы Си Цзиньпиннің Финляндияға сапары кезінде 15 жылға жалға алу келісімі бойынша әкелген болатын. Алайда соңғы жылдары зообақ қаржылық қиындықтарға тап болды, деп жазады финдік "Yle" басылымы, деп хабарлайды aqshamnews.kz.
"Яхтяри" зообағының басқарма төрағасы Ристо Сивонен бұл шешімге бірнеше факторлардың әсер еткенін айтты. Олардың ішінде:
коронавирус пандемиясы;
туристер санының азаюы;
Украинадағы жағдайға байланысты инфляция және пайыздық мөлшерлемелердің өсуі.
Осы қиындықтарды ескере отырып, зообақ қарыздарын қайта құрылымдау туралы өтініш беруді жоспарлап отыр.
Луми мен Пюрю есімді пандалар күздің соңына дейін зообақта болмақ. Кейін оларды халықаралық нұсқаулықтарға сәйкес карантинге орналастырады, бұл оларды Қытайға қайтару алдындағы дайындықтың бір бөлігі болып табылады.