Алматы қалалық кардиология орталығының кардиологы Ботакөз Әубәкірова құрамында май, тұз бен қанттың көптігімен белгілі фастфудтың — жүрек-қантамыр ауруларының басты себебінің бірі екенін айтты, деп хабарлайды Almaty-akshamy.kz.
Дәрігердің айтуынша, бұл тағамды үнемі тұтыну холестерин мен қан қысымының жоғарылауына әкелуі мүмкін.
Ал бұл жүрек ауруларының өршу қаупін арттырады.
«Фастфудтағы қаныққан май артерияда холестерин түйіндерінің пайда болуына әкелуі мүмкін. Бұл қалыпты қан ағымына кедергі келтіреді және атеросклерозға себеп болады. Осы жағдай миокард инфарктісі мен инсульт қаупін арттырады. Фастфудта тұздың көп болуы қан қысымының жоғарылауы — гипертонияға апарып соғуы ықтимал. Бұл — жүрек-қантамыр ауруларының негізгі қауіпті факторларының бірі», — деді Ботакөз Әубәкірова.
Фастфуд әдетте қант пен қарапайым көмірсуға бай.
Ал мұндай тағамды үнемі тұтыну қант диабетінің өршітеді. Жүрек проблемаларының тағы бір себебі — осы.
«Дұрыс тамақтану — жүрек денсаулығының кепілі екенін түсіну маңызды. Фастфудтың орнына жаңа піскен көкөніс пен жемісті, пайдалы майларды, мысалы, зәйтүн майы, балық майын және ақуыздың майсыз көздерін, мысалы, тауықтың төс еті немесе балық тұтынған жөн. Сондай-ақ, өз салмағыңызды бақылап, белсенді өмір салтын сақтау да маңызды. Тұрақты физикалық белсенділік жүрек пен қан тамырларын нығайтуға, сондай-ақ дененің жалпы жағдайын жақсартуға көмектеседі», — деді дәрігер.
Дәрігер фастфуд қолжетімді әрі жылдам дайындалуына байланысты жақсы тағам болуы мүмкін, алайда, денсаулығымыз — біздің басты байлығымыз екенін ұмытпауға кеңес берді.