Мемлекет басшысы Euronews директорлар кеңесінің төрағасы Педро Варгас Давидті қабылдады, деп хабарлайды aqshamnews.kz
Кездесуде Қазақстан мен Euronews телеарнасы арасындағы ынтымақтастық мәселелері қарастырылды.
Қасым-Жомарт Тоқаев Euronews арнасының елімізде аймақтық хабының ашылуын маңызды оқиға ретінде атап өтті. Президенттің пікірінше, бұл бастама арқылы әлемнің түкпір-түкпіріндегі көрермендер Қазақстанның ғана емес, бүкіл Орталық Азияның экономикалық, мәдени және туристік әлеуетімен жақын танысуға мүмкіндік алады. Сонымен қатар, бұл медиа алаң аймақ елдері мен Еуропа Одағы арасындағы диалог пен өзара түсіністікті нығайтуға ықпал етеді.
Педро Варгас Давид кездесу барысында Euronews Academy жобасының жоспарын таныстырды. Бұл бастама қазақстандық журналистерді заманауи технологиялармен жұмыс істеуге үйретіп, халықаралық кәсіби стандарттарды игеруіне бағытталған. Осы арқылы отандық медианың бәсекеге қабілеттілігін арттыруға жағдай жасалады.
Мемлекет басшысы Қазақстанның ақпараттық ортада тиімді жұмыс істей алатын білікті мамандарды даярлауға мүдделі екенін атап өтті. Өз кезегінде Педро Варгас Давид Қазақстан Президенті Қасым-Жомарт Тоқаевтың басшылығымен елімізде жүзеге асырылып жатқан реформалардың тұрақты даму мен қоғамның ашықтығын арттырудағы маңыздылығын жоғары бағалады.
Кездесу барысында сондай-ақ әлемдегі геосаяси жағдайға қатысты өзекті мәселелер талқыланды.