Испания астанасында Еуропа чемпионатының жеңімпаздарына арналған ауқымды концерт өтті. Оған мыңдаған адам қатысты, деп хабарлайды аlmaty-akshamy.kz.
Еуропа чемпионатын төртінші рет ұтқан Испания құрамасы еліне оралды. Содан кейін ЕУРО-2024-тің жеңімпаздары төбесі ашық автобуспен Мадридтің көшелерімен жүріп өтті. Оларға қошемет көрсеткен жұртта қисап жоқ. Кейіннен футболшылар корольдік астанасының қақ жүрегіндегі жеңіс концертіне қатысты. Ел туындай қызыл-сары киген халық, теңіздей толқыған Сибелес алаңы. Өткен түні бүкіл Испания шаттанды, ән шырқады, би биледі.
Осы ұлт үшін, Испания үшін осындай болып қала берейікші. Біз қазіргідей біртұтас болсақ, күштірекпіз. Жасасын Испания! - деді Испания құрамасының бас жаттықтырушысыЛуис Де Ла Фуэнте Кастильо.
Испания жексенбіде Англияны 2-1 есебімен жеңді. Оған Микель Оярзабал мен Нико Уильямстың арқасында қол жетті. Концертте осы екі ойыншыға құрмет ерекше көрсетілді. Еуропа турнирінің ең жас футболшысы атанған Ямалға да қошемет өте зор. 17 жастағы Ямал матчта жүріп мектеп бітірді.
Тағы бір айта кететін жайт, ойыншылар чемпиондық кубокты тура Берлиндегілей Сибелесте де басына көтерді.
Біздің жақсы команда екенімізді жоққа шығаруға болмайды. Жеті кездесуден – жеті жеңіс. Лайықтымыз әрине, - деді футбол жанкүйері Мигель Визкайно.
Осылайша жергілікті тұрғындардың кейбірі құрама мүшелерінің алуандығына риза. Бірқатар сарапшылардың ойынша мұндай адамдардың көптігі тарихы аймақтық және ұлтаралық шиеленіске толы елдің бірлігін күшейтуге үлкен үлес қоса алады.