Есірткімен ұсталған танымал рэпер Qarakesek көше тазалап жүр, – деп хабарлайды aqshamnews.kz тілшісі.
Өнер иесі Наурыз мерекесінен кейін жұмысқа кірісіп, белгіленген 100 сағатты өтеп жатыр.
SMARTNEWS.KZ басылымының хабарлауынша, Qarakesek лақап атымен белгілі әнші Омар Амантаев сот үкіміне сәйкес қоғамдық жұмысқа тартылып, Ақтөбеде көше тазалау жұмыстарына кірісті. Ақтөбе қаласы әкімінің баспасөз қызметінің мәліметінше, сот қаулысы Алматы ауданы әкімдігіне жолданған.
Өз кезегінде аудан әкімдігі оны қаладағы тазалыққа жауапты мердігер ұйым – Damu Life ЖШС-не бекіткен. Компания басшысы Жандос Ерекешовтің айтуынша, ол Наурыз мерекесінен кейін жұмысқа кіріскен. Қазір ол белгіленген 100 сағаттық қоғамдық жұмыс аясында көше тазалаушы ретінде еңбек етіп жатыр.
"Ол бізге жіберілді, қазір көше тазалау жұмыстарын атқарып жатыр. Белгіленген уақыт толық өтеледі. Компания қызметкерлеріне қатысты қосымша ақпарат берілмейді. Біздің ұйым Ақтөбедегі Заречный тұрғын алабына жауапты. Мұнда аялдамалар, жаяу жүргіншілер жолы мен саябақтар тазаланады", – деді компания өкілі.
Еске салайық, былтыр күзде Ақтөбеде есірткіге мас күйде көлік басқарған Qarakesek ұсталған болатын. Сот шешімімен ол 15 тәулікке қамалып, 7 жылға көлік жүргізу құқығынан айырылды. Сонымен қатар есірткі құралдарын заңсыз пайдалану дерегі бойынша қылмыстық іс қозғалған. Сотта Омар Амантаев өз кінәсін мойындаған.