Продюсер Баян Алагөзова журналист Дана Нұржігітке берген сұхбатында он жыл бұрын Қазақстанның халық әртісі Мақпал Жүнісова туралы фильм түсіруді жоспарлағанын, алайда әнші ұсыныстан бас тартқанын айтты, - деп хабарлайды Aqshamnews.kz.
Алагөзованың айтуынша, ол Жүнісовадан өмір жолын экранда көрсетуге рұқсат сұраған.
"Мақпал, сіздің тағдырыңызды фильмге түсіргім келеді дедім. Он жыл бұрын болған жағдай. Ол кезде де, қазір де бұл оңай емес екенін түсінемін. Бірақ бір күні сіз туралы үлкен экранға шығаратын дүние жасағым келетінін айттым. Сонда ол: “Маған ештеңе керек емес. Ешкімге ештеңе бермеймін. Мемуардың да қажеті жоқ” деп жауап берді", – деді продюсер.
Ол әншіні көз тірісінде бағалау қажеттігін атап өтті.
"Біз көбіне адам тірі кезінде сынап, кеткен соң ғана “қандай жақсы еді” деп айтатын қоғамбыз. Сол себепті талантты жандарды бар кезде қадірлейік", – деп түйіндеді Алагөзова.
Еске салайық, бұған дейін Мақпал Жүнісова әлеуметтік желідегі парақшасында Баян Алагөзоваға үндеу жасап, марқұм композитор Арман Дүйсеновтің отбасына үй алып беруге көмектесуін сұраған болатын.