Денсаулық сақтау министрлігі жедел жәрдем қызметіндегі өзгерістер туралы тағы да түсініктеме берді.
Денсаулық сақтау министрлігінің ресми өкілі Айгерім Уразалиева мәлімдегендей, барлық науқастар бұрынғыдай толық көлемде медициналық көмек алады, деп хабарлайды aqshamnews.kz
«Бүгін кейбір БАҚ-та жедел медициналық көмек көрсету ережелеріне өзгерістер енгізу туралы бұйрық жобасының мазмұнын қате түсіндіру жарияланды. Осыған байланысты нақтылаймыз: 103 нөміріне қоңырау шалған барлық науқастар шақыру категориясына қарамастан, толық көлемде медициналық көмек алады», — деді ол.
Министрліктің айтуынша, жеделдікті жақсарту мақсатында, IV категориядағы шақыруларды жұмыс уақытында алғашқы медициналық-санитарлық көмек көрсететін мобильді бригадаларға тапсырады.
Кешкі, түнгі және демалыс күндерінде барлық шақыру категориялары бойынша жедел жәрдем бригадалары қызмет көрсетеді.
«Осылайша, азаматтар үшін ештеңе өзгермейді, ешқандай шақыру назардан тыс қалмайды, ал жеделдік пен пациенттерге көрсетілетін қызмет сапасы жақсарады», — деп қосты Айгерім Уразалиева.