6 қыркүйекте АҚШ-тың Миннесота штатында, Лейквилл қаласындағы Эйрлейк шағын әуежайының жанында тікұшақ құлап, өртенді, деп хабарлайды Aqshamnews.kz Fox News-ке сілтеме жасап.
Полицияның мәліметінше, Robinson R66 маркалы тікұшақ жергілікті уақыт бойынша сағат 14:45 шамасында табылған. АҚШ-тың Көлік қауіпсіздігі жөніндегі ұлттық кеңесі апаттың себебі әзірге белгісіз екенін жеткізді.
Бортта қанша адамның болғаны анықталмағанымен, жергілікті билік олардың ешқайсысы аман қалмағанын хабарлады.
Қазір оқиғаны NTSB мен FAA бірлесіп тергеп жатыр.
Айта кетейік, Лейквилл қаласы Миннеаполистен оңтүстікке қарай 30 шақырым, ал Сент-Полдан 40 шақырым жерде орналасқан. Robinson R66 – бір қозғалтқышты, бес орындық, әйнек кабинасы бар тікұшақ.