Қазақстанда өкпе обыры туралы хабардарлықты арттыру апталығы аяқталды, – деп хабарлайды aqshamnews.kz тілшісі.
Онкологиялық аурулармен күрес жөніндегі Кешенді жоспар аясында ұйымдастырылған іс-шаралар халықтың хабардарлығын арттыруға және өкпе ауруларын ерте анықтауға бағытталды. Апта барысында 1 287 адам онколог дәрігерлердің консультациясын алды.
Олардың ішінде 914 қатысушыға кеуде қуысы ағзаларының төмен дозалы компьютерлік томографиясы (ТДКТ) жүргізілді.
Акцияға Қазақстан тұрғындарымен қатар, шетелде тұратын отандастарымыз да қатысты. Германиядан келген екі қазақстандық Қазақстанда жүрген кезінде акцияға қатысып, медициналық тексеруден өтті.
Тексеру нәтижесінде 39 адамда (4,3%) өкпеде қатерлі үдеріске күдікті ошақты өзгерістер анықталды. Аталған жағдайлардың барлығы өзгерістердің сипатын нақтылау және диагнозды верификациялау мақсатында қосымша тексеруге жіберілді.
Сонымен қатар мамандар 70 жағдайда (7,7%) обыралды өзгерістерді және 433 жағдайда (47,4%) басқа да ауруларды анықтады.
Қатысушыларға қосымша 218 диагностикалық зерттеу және зертханалық талдау жүргізілді.
Акция барысында онкологтар қатысушылармен жеке ақпараттық-түсіндіру жұмыстарын жүргізіп, зерттеудің мақсаты мен маңызы, ерте диагностиканың маңыздылығы туралы айтып, пациенттердің сұрақтарына жауап берді. Осындай тәсілдің арқасында бастапқыда тексеруден өтуден бас тартқан көптеген қатысушы өз шешімін өзгертіп, зерттеуден өтті.
«Апта қорытындысы тек онкологиялық үдеріске күдікті өзгерістерді ғана емес, сонымен қатар одан әрі медициналық бақылауды қажет ететін обыралды жағдайлар мен басқа да ауруларды анықтауға мүмкіндік беретінін көрсетті», – деп атап өтті Қазақ онкология және радиология ғылыми-зерттеу институтының радиология және ядролық медицина бөлімінің меңгерушісі Жандос Мұқтарұлы Аманқұлов.
Ерте диагностика ауруды дер кезінде анықтап, қажетті емді уақытылы бастауға мүмкіндік береді. Сондықтан жоғары қауіп тобына жататын азаматтарға тексеруді кейінге қалдырмай, диагностикадан өту қажеттілігін дәрігермен талқылау маңызды.