Көпшілік ойлағандай, егер біз АЭС салатын болсақ, бұл шетелдік технологияға толықтай тәуелді болу дегенді білдірмейді. Себебі, әлемде бірде-бір мемлекет атом электр станциясын толықтай өздігінен салған емес.
Бұл жерде тәжірибе, технологиялық база және мамандардың болуы маңызды рөл атқарады. Егер елде АЭС салу тәжірибесі болмаса, бұл бағытта дайындық қажет.
АЭС салу кезінде міндетті түрде бас мердігер болуы қажет. Менің ойымша, бұл ел атом өнеркәсібінде кем дегенде 30 жылдық тәжірибесі бар ел болуы тиіс. Бұл шешім саяси емес, тек экономикалық тұрғыдан қарастырылуы қажет. Бізге ең сенімді, тиімді және Қазақстанға қолайлы нұсқаны таңдау маңызды.
Мен еліміздің мамандары локализация мәселелерін барынша қарастырады деп сенемін. Оған отын өндірісі, қазақстандық кадрларды даярлау, жабдықтарды жеткізу және сервистік қызметтерді көрсету сияқты мәселелер кіреді. Осылайша, Қазақстан АЭС-ті өздігінен басқарып, қызмет көрсете алады және технологиялық тәуелділіктен сақтанады.
Атом энергетикасы біздің болашағымыз үшін маңызды, сондықтан біз бұл қадамды барынша тиімді түрде жасауымыз керек.