Вакцинация тұмау қаупін азайтады. Бұл туралы Алматы қаласының санитарлық-эпидемиологиялық бақылау департаменті басшысының орынбасары Әсел Қалықова Өңірлік коммуникациялар қызметінің брифингінде хабарлады, деп хабарлайды aqshamnews.kz
Оның айтуынша, Алматыда 2024 жылдың қараша айынан бастап тұмаудың 168 жағдай, олардың көбі вакцинация алмаған азаматтар арасында тіркелген. Вакцинация алдын алудың ең тиімді шарасы болып қала береді.
Науқастардың көпшілігі (72%) А/H1N1 типті тұмау вирусын, қалғандары В типті вирусты жұқтырған.
Статистика көрсеткендей, жағдайлардың ең көп пайызы әртүрлі саладағы жұмысшылар (27,9%), жүкті әйелдер (23,8%) және балалар (23,2%) арасында тіркелген. Сондай-ақ, қауіп тобында студенттер, зейнеткерлер және жұмыс істемейтін азаматтар болды.
Маман инфекцияның негізгі себебі вакцинациядан бас тарту болып қала беретінін атап өтті. Күзгі маусымда Алматының 232 830 тұрғыны тұмауға қарсы екпе алды, бұл халықтың 10,16% құрайды.
Дәрігерлер қала тұрғындарына келесі ауру толқынына дейін вакцинациядан өтуге және қарапайым профилактикалық шараларды сақтауға кеңес береді: ауру жұқтырған адамнан аулақ болу, бөлмелерді үнемі желдету және аурудың алғашқы белгілері пайда болған кезде дәрігерге жүгіну.