Қарағанды облыстық мәслихатының депутаты, әлеуметтік-мәдени даму және әлеуметтік қорғау жөніндегі тұрақты комиссияның төрайымы Қадиша Оспанова энергетикалық тапшылықтың өзекті мәселе екенін атап өтті.
Оның айтуынша, Қарағанды облысында жаңа өнеркәсіптік кәсіпорындар, «Сарыарқа» арнайы экономикалық аймағы және «Саран» индустриалды аймағы құрылысы қарқынды дамып, энергияға деген сұраныс артып келеді. Сонымен қатар, тұрғын үйлер, мектептер, ауруханалар мен спорт кешендері де тұрақты энергиямен қамтуды қажет етеді. Алайда, жылу электр стансалары мен жел және күн энергетикасы бұл қажеттіліктерді толық қанағаттандыра алмайды.
Оспанова атом электр станциясы салу мәселесінің орынды екенін айта келе, медициналық қызметкер ретінде АЭС-тің қауіпсіздігі мен жұмысшылардың денсаулығы қалай қамтамасыз етілетінін ерекше қызығушылықпен сұрады.
Ұлттық ядролық орталықтың бас директоры Ерлан Батырбеков заманауи реакторлардың қауіпсіздігі жоғары екенін, олардың радиацияның таралуын болдырмайтын көп деңгейлі қорғаныс жүйелерімен жабдықталғанын айтты. Оның айтуынша, ауыр апаттың ықтималдығы өте төмен – 10 миллион жылда бір жағдай болуы мүмкін.
Депутат АЭС-тің санитарлық-қорғау аймағы өндірістік алаңмен ғана шектелмейтінін, қорғаныс шаралары бірнеше километрге дейінгі аумақты қамтитынын қоса айтты.