Пробация қызметінің есебінде тұрған сотталғандар үшін әлеуметтік қолдау алу процесі жеңілдеді. Енді олар жаңа “FSM Social” мобильді қосымшасы арқылы мемлекеттік органдардан онлайн түрде көмек сұрай алады, - деп хабарлайды Аqshamnews.kz тілшісі.
Қосымшаның мүмкіндіктері
Жаңа сервис қоғамнан оқшаулаумен байланысты емес жазаға тартылғандарға қолжетімді. Бұл қосымша арқылы:
-
әлеуметтік-психологиялық және заңгерлік кеңеске жүгіну;
-
жұмыссыздық мәселесі бойынша тиісті мекемелерге өтініш жолдау;
-
түрлі әлеуметтік қолдау шараларына өтініш беру мүмкіндігі пайда болады.
Қосымшаны пайдалану үшін пробация инспекторына жүгініп, өз сұрағын геолокация мен фотосурет қоса отырып, “FSM Social” арқылы жіберу жеткілікті.
Алғашқы нәтижелер
Қазір Ақтөбе облысында пробация қызметінде есепте тұрған және түзеу мекемелерінен босатылған 200-ге жуық адам қосымшаны пайдаланып, түрлі бағытта көмек алуға өтініш білдірген.
Қажет қолдау бағыттары қандай?
-
Заңгерлік көмек: шамамен 50 адам банк шоттарының бұғатталуына байланысты кеңес алған.
-
Жұмыспен қамту: 14 адам Мансап орталығының мамандарымен бірлесіп, бос жұмыс орындары жәрмеңкесіне шақырту алды.
Мамандардың пікірінше, “FSM Social” қосымшасы тек сотталғандарға қажетті көмек көрсетіп қоймай, олардың қайта қылмыс жасауына итермелейтін факторларды азайтуға ықпал етеді. Сонымен қатар, пробация инспекторларының жұмысын да жеңілдетеді.