Көлік министрлігі ақылы жолдарда төлем жасау тәртібін жаңартуды жоспарлап отыр. Жаңа өзгерістер жүргізушілерге төлемді уақытында өтеуге көбірек мүмкіндік беріп, айыппұлға ілігу қаупін азайтуды көздейді, деп хабарлайды AqshamNews.kz тілшісі.
Көлік министрлігінің хабарлауынша, қазір қолданыстағы ереже бойынша жүргізуші ақылы жол ақысын 7 күнтізбелік күн ішінде төлемесе, 8-күні материалдар ӘҚБтК талаптарына сай көлік бақылау органдарына жолданады.
Алдағы уақытта бұл тәртіп жеңілдетіледі: енді жеке тұлғаларға төлем жасауға 30 күнтізбелік күн беріледі. Егер жолақы пайдаланған күннен бастап 30 күн ішінде төленбесе, материалдар 31-күні көлік бақылау органдарына жіберілмек.
Сонымен қатар жаңа ережеде заңды тұлғалар үшін бөлек механизм енгізіледі. Егер заңды тұлға есептік кезең аяқталғаннан кейінгі айдың 20-сына дейін төлем жасамаса, материалдар келесі күні көлік бақылау органдарына жолданады.
Министрлік бұл өзгерістер төлем процесін барынша ыңғайлы әрі түсінікті етіп, төлем мерзімін ұлғайтуға және объективті себептермен кешіккен жағдайда әкімшілік жауапкершілікке тартылу тәуекелін төмендетуге бағытталғанын атап өтті.