Мемлекет басшысы жариялаған Жұмысшы мамандықтар жылында қарапайым еңбек адамдарын бағалау мен дәріптеу – ел дамуының маңызды бағытына айналды. Өйткені кәсібіне адал, ісіне тиянақты мамандар – нағыз ел тірегі. Солардың бірі – бульдозер машинисі Болат Жолтайұлы Кенжемұханов.
Ол өндіріс саласында 34 жылдан астам еңбек етіп келеді. Көп жылғы тәжірибесі мен кәсіби шеберлігі арқасында Болат Жолтайұлы бүгінгі таңда ұжымына да, қоғамға да үлгі болып отыр. Өзінің еңбек жолын «Қостанай минералдары» акционерлік қоғамында бастап, жиырма жылға жуық сол кәсіпорында тер төкті, ал соңғы жылдары «Комаров тау-кен кәсіпорны» ЖШС-де қызметін жалғастыруда.
Болат Жолтайұлы – тек мықты маман ғана емес, сондай-ақ жастардың нағыз тәлімгері. Жаңа келген жұмысшыларға бағыт-бағдар беріп, өз білімін аямай бөлісетін тәжірибелі маман. Ол бульдозер техникасының қыр-сырын жетік меңгеріп, қауіпсіздік талаптарын әрдайым бірінші орынға қояды.
Әріптестері оны қарапайымдылығы мен адалдығы үшін, ал басшылық жоғары кәсібилігі үшін құрметтейді. Жұмыстағы ұқыптылық, тәртіпке деген жауапкершілік – оның басты қағидалары.
Болат Жолтайұлының көп жылғы қажырлы еңбегі лайықты бағаланды. Ол 2022 жылы «Кенші даңқы» III дәрежелі төсбелгісімен марапатталды. Бұл – тек бір адамның емес, тұтас бір ұрпақтың еңбегіне берілген баға. Бұл марапат кен өндіру саласында көп жыл бойы абыройлы қызмет етіп жүрген, ел игілігі жолында аянбай еңбек еткен азаматтарға беріледі. Б.Жолтайұлы бұл құрметке ісімен де, өмірлік ұстанымымен де әбден лайық.
Болат үшін басты құндылық – отбасы. Жұбайымен бірге екі бала тәрбиелеп, оларға еңбекке деген сүйіспеншілікті, адамдарға деген құрметті және туған елге адал болуды үйретті. Бұл – көп жылдық еңбек жолымен қатар жүретін адамдық өнеге.
Бүгінде ұрпағына өнеге бола білген еңбек адамы – қоғам үшін де, ұрпақ үшін де баға жетпес тұлға.