Президент Қасым-Жомарт Тоқаев Парламент палаталарының бірлескен отырысында сөйлеген сөзінде Қазақстан халқына Жолдауын жариялады. Ол еліміздегі көптеген азаматтардың бірнеше несиесі бар екені туралы айтып, бұл мәселенің өзектілігін және қоғамдық қатерге айналғанын атап өтті, деп хабарлайды aqshamnews.kz
Мемлекет басшысы осы бағытта арнайы заңдар қабылданғанын және халықтың әл-ауқатын жақсартуға бағытталған шаралардың қолға алынғанын мәлімдеді.
Президент өткен сессияда Парламенттің жемісті жұмыс атқарғанын, соның нәтижесінде 102 заң қабылданғанын ерекше атап өтті. Бұл заңдар қоғамдық бақылау, адам саудасына қарсы күрес, ғылым мен технология саясаты, жылу энергетикасы және басқа да маңызды мәселелерді реттейтін құжаттар болып табылады.
Әлеуметтік салаға, әсіресе балаларды қорғауға ерекше назар аударылғанын айтты. Ұлттық қордан балалардың есепшотына қаржы аудару туралы заң қабылданып, балаларды құмар ойындарға тартқандарға әкімшілік жаза қарастырылған. Сонымен қатар, кәмелетке толмағандарға зорлық-зомбылық көрсеткені үшін берілетін жаза күшейтілді, әйелдер мен балаларға қатысты қылмыстардың алдын алу бойынша заңдар қабылданды.
Мемлекет басшысы Парламент мүшелеріне халықпен тығыз байланыста жұмыс істеп, «Халық үніне құлақ асатын мемлекет» қағидасын орнатуға ықпал еткені үшін ризашылығын білдірді. Сонымен бірге, алда әлі де көп жұмыс атқару қажет екенін атап өтті.