Қазақстан астанасында Орталық Азиядағы әуе кемелеріне техникалық қызмет көрсетін алғашқы орталық ашылады
Мұнда алдымен әскери ұшақтар жөнделетін болады. Ал алдағы уақытта сервистік қызметпен азаматтық авиациядағы әуе кемелерін де қамту жоспарда бар, деп хабарлайды Almaty-akshamy.kz
«Бұл қызмет көрсету орталығы бүкіл Орталық Азия аймағын қамтиды. Әскери бағыт аясында «Airbus СИ295» ұшағын меңгеріп жатырмыз. Меморандумға сәйкес, «Airbus» компаниясы бұл жерде техникалық аудит жүргізген. Біздегі барлық мүмкіндік талқылануда», - дейді ҚР ИИДМ Қорғаныс өнеркәсіп кешені департаментінің басқарма басшысы Оралбай Мәмбетов.
Қызмет көрсету орталығын құру ұшақ жөндеудің күрделі түрлеріне көшуге мүмкіндік беретінін атап өткен жөн. Өйткені бұрын мұндай жұмыстар Испанияда ғана орындалатын. Отандық мамандарды оқыту мен дайындау да сол мемлекетте жүргізілген еді. Алдағы екі жылда ел ішінде ұшақтарға толық техникалық қызмет көрсетуді игеру жоспарлануда.
«Осы үлгідегі ұшақтарда көп жылдар бойы жұмыс істеген тәжірибелі шетелдік мамандар тартылған. Біліктілік пен тәжірибе алмасу да бар. Отандық кәсіпорындарда жөндеу жұмыстарының локализациялау үлесі артып келеді», - деді «Қазақстандық авиациялық индустрия» ЖШС жобалар басқармасының басшысы Айдар Әнуарбек.