Бұл сотқа дейінгі тергеуді жеңілдетеді.
Парламент Сенатында «Сот жүйесін реформалауды заңнамалық қамтамасыз ету» мәселесі талқыланып жатыр, деп хабарлайды Almaty-akshamy.kz ҚазАқпаратқа сілтеме жасап.
«Қоғамда осы саладағы өзгерістерге деген сұраныстың жоғары екені белгілі. Мемлекет басшысы наурыз айындағы Жолдауында барлық деңгейдегі соттар, шын мәнінде, тәуелсіз, ашық және кәсіби болмаса, заң үстемдігін қамтамасыз ету мүмкін емес екенін айрықша атап өтті. Соңғы уақытта бұл бағытта ауқымды жұмыс атқарылды. Дегенмен, шешімін таппаған мәселелер де аз емес», - деді ҚР Парламенті Сенатының төрағасы Мәулен Әшімбаев өзінің кіріспе сөзінде.
Оның айтуынша, Қасым-Жомарт Тоқаев өзінің сайлауалды бағдарламасында объективті және тәуелсіз сот әділетті мемлекеттің негізі екенін атап көрсетті.
Президент тапсырмасына сәйкес, Сенат жанынан сот жүйесін жетілдіруге арналған бастамаларды пысықтау жөнінде жұмыс тобы құрылды.
Оның құрамында Жоғарғы соттың, мемлекеттік органдардың, және қоғамдық ұйымдардың өкілдері мен сарапшылар бар.
«Жұмыс тобына реформалар аясында нақты тетіктерді әзірлеу және тиісті заң жобасын дайындау міндеті жүктелді. Біздің бүгінгі жиынымыздың басты мақсаты – сол жұмыс тобы әзірлеген ұсыныстарды талқылау және оларды әрі қарай жетілдіру», - деді Сенат төрағасы.
Сонымен бірге, бүгін қаралып жатқан ұсыныстардың негізінде Жоғарғы соттың бастамалары жатыр, бұл бастамалар мүдделі мемлекеттік органдардың қатысуымен Сенатта пысықталған.
«Жалпы, жұмыс тобы сот жүйесін реформалау бойынша маңызды, өзекті ұсыныстар дайындады деп ойлаймын. Бүгін біз қарастыратын нәрсе – сот жүйесін жаңғырту жөніндегі ұсыныстардың бір бөлігі ғана. Осылайша, судьяларға күш құрылымдарының қысымын төмендету мен қылмыстық процесте бәсекелестікті дамыту тетіктері пысықталды. Қылмыстық теріс қылықтар туралы істерді бөлек оңайлатылған іс жүргізуге бөлу ұсынылады. Бұл сотқа дейінгі тергеуді жеңілдетеді, тергеушілерге, прокурорлар мен судьяларға жүктемені айтарлықтай азайтады. Тұтастай алғанда, істердің жекелеген санаттары бойынша сот талқылауларының жарыспалылығын кезең-кезеңімен, 5 жыл ішінде дамыту ұсынылады», - деді Мәулен Әшімбаев.