Қазақстанда Қорғас торабында жүк және жолаушыларға арналған жаңа әуежай салынады, деп хабарлайды Aqshamnews.kz тілшісі.
Сауда және интеграция министрі Арман Шаққалиевтің айтуынша, Қазақстан–Қытай шекарасындағы Қорғас торабында SkyHansa жүк-жолаушылар әуежайы бой көтереді. Ол хабты дамытудың негізгі элементіне айналып, өңірдің өткізу қабілетін айтарлықтай арттыруға мүмкіндік береді.
Министрдің мәліметінше, шекарада Қытаймен бірлескен толыққанды логистикалық кешен құрылып жатыр. Жаңа әуежай транзитті күшейтіп, жүк ағындарының көлемін ұлғайтуға және жаңа бағыттар ашуға жол ашады.
Қазіргі уақытта «Қорғас – Шығыс қақпасы» АЭА аумағында 64 қатысушы тіркелген. Жалпы құны 58,6 млрд теңге болатын 32 инвестициялық жоба жүзеге асырылып, шамамен 2 300 жұмыс орны құрылған. Ірі жобалар қатарында қазақстан-қытай өнеркәсіптік қаласы, жел энергетикалық қондырғылар мен энергия сақтау жүйелерін өндіретін зауыт, металл бұйымдары өндірісі, сондай-ақ кофе және шай сусындары зауыты бар.
Сонымен бірге хабтағы логистикалық инфрақұрылым ауқымды жаңғыртудан өтіп жатыр: «Khorgos Gateway» терминалы 18 теміржол желісіне дейін кеңейтіліп, Қытайдың еркін экономикалық аймағымен тікелей логистикалық дәліз құрылып жатыр. Sarens компаниясының өндірістік-логистикалық кешені мен бондтық қоймалар да салынып жатыр.
Арман Шаққалиевтің айтуынша, Қорғас торабы Қазақстан мен Қытай арасындағы өзара сауда мен экономикалық ынтымақтастықты күшейтетін маңызды буынға айналып, шекарада тұрақты индустриялық орта қалыптастыруға ықпал етпек.