Француз компаниясы еліміздің 4 өңірінде электровоз өндірісін және оларға қызмет көрсететін орталықтарды ашуды жоспарлап отыр.
Мұны БАҚ өкілдерінің қатысуымен өткен брифингте Сыртқы істер министрінің орынбасары Роман Василенко айтты, деп хабарлайды Almaty-akshamy.kz ҚазАқпаратқа сілтеме жасап.
«Total Energies» француз компаниясының Жамбыл облысында салып жатқан қуаты 1 гигаватт болатын жел электр станциясы жобасына ерекше тоқталғым келеді. Бұл нысанды 2026-2027 жылдары пайдалануға беру жоспарланып отыр. Оның құны 1,9 млрд долларға бағаланады. Бұдан басқа, «Alstom» компаниясы Астана, Алматы қалалары мен Жамбыл және Түркістан облыстарында электровоз өндірісін және оларға қызмет көрсететін орталықтарды құруды жоспарлап отыр. Бұл жобаны іске асыру кезінде 1 мыңнан астам жергілікті мамандар даярланады», - деп жоспарларға тоқталды», - деп атап өтті Сыртқы істер министрінің орынбасары.
Брифинг барысында Роман Василенко аймақтағы геосаяси жағдайға байланысты көптеген еуропалық компаниялар біздің елге келуге ниет білдіріп жатқанын айтты.
Сонымен бірге министрдің орынбасары былтыр Қазақстан мен Еуропалық одақ арасындағы өзара тауар айналымы 27,6%-ға өсіп, 40 млрд долларға жеткенін атап өтті.