Қазақстан Үкіметі 2024 жылғы 7 тамыздағы қаулысымен босқын мәртебесін беру, ұзарту, айыру және тоқтату ережелеріне өзгерістер енгізді, деп хабарлайды aqshamnews.kz
Жаңа түзетулерге сәйкес, босқын деп тану туралы шешім жергілікті атқарушы орган тарапынан шешім қабылданған күннен бастап бес жұмыс күні ішінде табыс етіледі.
Егер адам босқын деп тану туралы шешімнің көшірмесін алғаннан кейін үш ай ішінде босқын куәлігін алу үшін жергілікті атқарушы органға келмесе және оның өзі көрсеткен мекенжайы бойынша келмейтіні туралы хабарлама келіп түссе, немесе оның Қазақстаннан тыс жерге кеткені туралы ақпарат алынса, жергілікті атқарушы орган босқын мәртебесін беру туралы шешімнің күшін жояды.
Сонымен қатар, егер пана іздеуші адамға босқын мәртебесін беруден бас тартылса, жергілікті атқарушы орган бас тарту туралы шешім қабылданған күннен бастап бес жұмыс күні ішінде бас тарту себептерін және шешімге шағымдану тәртібін көрсете отырып, шешімнің көшірмесін табыстайды немесе ол тұрған жері бойынша жібереді. Қабылданған шешім туралы уәкілетті орган мен ішкі істер органдарына хабар беріледі.