Қазақстанда жүргізілген геологиялық барлау жұмыстары нәтижесінде алтын қоры шамамен 98 тоннаға көбейді, - деп хабарлайды Аqshamnews.kz тілшісі. Бұл туралы ҚР Индустрия және құрылыс вице-министрі Иран Шархан Үкімет отырысында мәлімдеді.
Оның айтуынша, елімізде бүгінде 103 түрлі пайдалы қазба мен 10 мыңға жуық кен орны мемлекеттік есепте тұр. Қазір қатты пайдалы қазбалар бойынша 2 907 лицензия және 251 келісімшарт қолданыста. Биылдың өзінде барлау үшін 707, өндіру үшін 22 лицензия берілген.
Вице-министр алғаш рет есепке алынған бес жаңа кен орнын атады:
– Көк-Жон (Болаттөбе учаскесі),
– Алтын-Шоко,
– Самомбет,
– Студентский,
– Тақыр-Қалжыр.
Барлау нәтижесінде 36 мың тонна мыс, 11 млн тонна марганец, 1,3 млн тоннадан астам фосфорит қоры да өсіп отырғаны атап өтілді.
Иран Шарханның айтуынша, бұл көрсеткіштер геологиялық зерттеулердің тиімділігін және Қазақстанда жер қойнауын пайдалануға деген қызығушылықтың арта түскенін дәлелдейді.