Үкіметте жастар саясаты және білім беру саласын дамыту жобалары қаралды.
2029 жылға қарай 2,3 миллион жасты жұмыспен қамту жоспарланып отыр. Бұл туралы бүгін Премьер-Министр Әлихан Смайыловтың төрағалығымен өткен кеңесте айтылды, деп хабарлайды Аlmaty-akshamy.kz ҚР Үкіметінің Telegram-каналына сілтеме жасап.
Кеңесте жастар саясаты және мектепке дейінгі, орта, техникалық және кәсіптік білім беруді дамыту тұжырымдамаларының жобалары қаралды.
Ақпарат және қоғамдық даму министрі Дархан Қыдырәлі Жастар саясаты тұжырымдамасының жобасы 6 бағыт пен 10 нысаналы индикаторды және 72 іс-шараны қамтитынын айтты.
«Біз 2029 жылға қарай мемлекеттік қолдау шаралары туралы жастардың хабардарлығын 90% дейін, волонтерлік, қайырымдылық және экологиялық бастамаларға тартылу деңгейін 32% дейін арттыруды көздеп отырмыз», — деді Д. Қыдырәлі.
Сонымен қатар Тұжырымдама жобасы жас кәсіпкерлердің үлесін 30% дейін, жұмыспен қамту орталықтарына жүгінгендер арасынан жұмысқа орналастырылған жастардың үлесін 61% дейін ұлғайтуды көздейді.
2029 жылға қарай 2,3 миллион жасты жұмыспен қамту жоспарлануда, оның 1 миллионы – ауыл тұрғындары. Сонымен қатар ауылдық жерлерде тұратын 1,5 миллион жас қазақстандық цифрлық сауаттылыққа оқытылатын болады.
Техникалық және кәсіптік білім беру жүйесінде қазақстандық жастардың колледждерде сұранысқа ие мамандықтар бойынша тегін білім алуына баса назар аударылды.