Бұл пиротехникалық заттардың сертификаты жоқ.
25 желтоқсан мен 3 қаңтар аралығында республикада «Пиротехника» жедел-профилактикалық іс-шарасы өтті, деп хабарлайды Almaty-akshamy.kz Polisia.kz-ке сілтеме жасап.
Полиция қызметкерлері төтенше жағдайлар департаментінің қызметкерлерімен бірлесіп, азаматтық пиротехникалық заттар мен бұйымдардың айналымы ережелерінің сақталуына бақылау жүргізді.
Жаңа жыл түні отшашуларды қолдану кезінде 15 адам, оның ішінде кәмелетке толмаған алты бала күйіп қалды.
«Мысалы, елордада 1 қаңтарда түнде аулада отшашуды қолдану кезінде екі бала мен олардың әкесі ерні мен қолын күйдіріп алған. Тағы бір оқиға Астанадағы Нәжімеденов көшесінде болды. Пиротехникалық заттарды дұрыс пайдаланбау салдарынан балкон өртенді. Зардап шеккендер мен қайтыс болғандар жоқ», - деді полицейлер.
Polisia.kz-тің мәліметінше, үй иесі полицияға хабарласпаған. Жедел-профилактикалық іс-шара басталғаннан бері барлығы 16 400 сертификатсыз пиротехникалық өнім тәркіленді.
Бір апта ішінде пиротехникалық бұйымдарды сату ережелерін бұзғаны үшін 842 тұлға әкімшілік жауапкершілікке тартылды.