Бүгін Қазақстанда 3 млн 700 мыңнан астам оқушы оқу жылын аяқтап жатыр, деп хабарлайды Almaty-akshamy.kz.
«Еліміз бойынша 172 мың түлек 11 сынып бітірді, оның 6 мың 800-і «Алтын белгі» үміткерлері. Ал 9-сыныпты 288 мыңнан астам түлек тәмәмдады. 1-10 сыныптар аралығындағы балардың 85,3% жазғы демалыс және сауықтырумен қамтылатын болады. Бұл – ел бойынша 2 млн 800 мың бала. Оның ішінде 500 мың жекелеген санаттағы отбасы балалары бар», - делінген Оқу-ағарту министрлігінің хабарламасында.
Балалар демалысын ұйымдастыру үшін қалалар сыртында 218 және мектеп жанындағы, профилдік, шатырлы 10 200 лагерь жұмыс істейтін болады.
Сонымен қатар «Этноауыл», «Жаздық жолдама» жобалары іске асырылады. Жетекші университеттер жанындағы жазғы және олимпиадалық резерв мектептері жұмыс жасайды.
«Жазғы демалыста 1 млн 400 мың бала үшін қосымша білім беру мекемелеріндегі секциялар мен үйірмелер ашылады. Ғылыми-техникалық, музыкалық, көркемдік, экологиялық, туристік және басқа да бағыттардағы 11 мың үйірме балаларды қабылдайды», - делінген хабарламада.
Сондай-ақ балалар «Жасыл ел» бағдарламасы шеңберінде көгалдандырумен шұғылданады, еліміздің киелі жерлеріне саяхаттап, спорттық жаттықтыру жиындарында шынығады, тілдік курстарға қатыса алады.