Электрсамокат айдайтындарға ескерту: қандай ережелер мен айыппұлдар бар?

Кейінгі жылдары Алматы көшелерінде электрсамокатпен жүретіндер саны күрт артты. Уақытты үнемдеудің, кептелістен қашудың және экологиялық көлікті таңдаудың ыңғайлы жолы ретінде танылған бұл көлік түріне қатысты қазір нақты ережелер қалыптасып жатыр. Дегенмен, көп жүргізуші заң талаптарын толық білмейді. Аqshamnews.kz бұл көлік құралын тізгіндейтіндерге қандай жағдайда айыппұл салынатыны туралы айтады.

Электрсамокат көлік құралы ма?

2023 жылы Қазақстанда электрсамокаттың жол қозғалысына қатысты мәртебесі заңмен бекітілді. Демек, оны басқару үшін белгілі бір талаптар бар.

Жол қозғалысы ережелері қандай?

1. Жас шектеуі: электрсамокатты 18 жастан асқан азаматтар ғана айдай алады.

2. Жүргізуші куәлігі болуы керек: электрсамокатты көлік жүретін жол бойымен айдасаңыз, жүргізуші куәлігіңіз болуы керек. 

3. Жылдамдық шектеуі:

   • Жолда: 25 км/сағ дейін,

   • Тротуар мен жаяу жүргінші жолында: 6 км/сағ аспау керек.

4. Қай жерде жүруге болады?

   • Бірінші кезекте велосипед жолымен жүру міндетті.

   • Егер велосипед жолы болмаса, жолдың оң жақ шетімен қозғалуға рұқсат етіледі.

5. Тыйым салынған әрекеттер:

   • Қосымша адам отырғызу,

   • Ауыр жүк алып жүру,

   • Рульді бір қолмен ұстау,

   • Түнде жарық шағылыстырғыш киімсіз жүру,

   • Қауіпсіздік каскасын кимеу.

Қауіпсіздік үшін кеңестер

• Каска киіңіз – бұл жарақат алу қаупін едәуір азайтады.

• Жолда жүргенде – велосипед жолағын таңдаңыз.

• Қараңғыда шағылыстырғыш белдік, киім немесе фара пайдаланған жөн.

• Жаяу жүргіншілер арасында жүрмеңіз, қажет болса, самокаттан түсіп, жаяу өтіңіз.

Айыппұл қандай?

Электрсамокат жүргізушілері заң бұзған жағдайда Әкімшілік құқықбұзушылық туралы кодекс аясында жауапкершілікке тартылады.

• Қоғамдық тәртіпті бұзу, жол ережесін сақтамау немесе басқа азаматтардың қауіпсіздігіне қауіп төндіру – 5 АЕК мөлшерінде айыппұл (2025 жылы - шамамен 17 250 теңге).

• Қаладағы жалға берілетін самокаттарды тұраққа дұрыс қоймау:

  • 1-рет – ескерту немесе 100 теңге,

  • 2-рет – 1 000 теңге,

  • 3-рет – 3 000 теңге,

  • 4 және одан кейінгі жағдайларда – 10 000 теңге.

Айта кетейік, Алматыда құқық қорғау органдары тарапынан электрсамокат айдаушыларға қатысты рейдтер жиілеп келеді. 

Кейінгі дерекке сәйкес, самокаттар 127 жол апатына себепші болған. Бұдан 133 адам зардап шеккен.