Қарағанды облыстық мәслихатының депутаты және «Байтақ» партиясының Қарағанды облыстық филиалының төрағасы Сейфул-Мәлік Қазитов Қазақстанда АЭС салу жобасын қолдайтынын мәлімдеді, деп хабарлайды aqshamnews.kz.
«Атом энергетикасы – елдің экономикалық дамуы мен экологиялық тұрақтылығына септігін тигізетін маңызды фактор. АЭС таза энергия көзі ретінде энергетикалық қауіпсіздікті қамтамасыз етіп қана қоймай, экономиканың түрлі секторларына жағымды әсерін тигізеді», – деді Қазитов.
Президент Қасым-Жомарт Тоқаев өзінің Жолдауында АЭС салу қажеттілігін атап өтіп, бұл мәселені жалпыұлттық референдум арқылы шешуді ұсынған болатын. Қазитов Президенттің бұл бастамасын қолдайтынын және атом энергетикасын дамыту ел үшін маңызды стратегиялық шешім екенін атап өтті.
«АЭС салу – елдің тұрақты дамуына және экологиялық таза энергияны өндіруге мүмкіндік беретін жобалардың бірі. Бұл жоба ұзақ мерзімді перспективада Қазақстанның экономикасы мен халықтың әл-ауқатына жағымды әсер етеді», – деді ол.
Сондай-ақ, депутат қазіргі уақытта атом энергетикасы саласында жаңа буын реакторлары сияқты инновациялық технологиялар белсенді түрде дамып келе жатқанын және бұл бағытта Қазақстанның да айтарлықтай әлеуеті бар екенін айтты.
«Еліміз уран қоры бойынша алдыңғы қатарлы мемлекеттердің бірі ретінде, атом энергетикасының дамуына үлкен үлес қоса алады. Сондықтан бұл жобаны қолдау – біздің келешек ұрпақтың тұрақты дамуын қамтамасыз етудің маңызды қадамы», – деді Сейфул-Мәлік Қазитов.