Ерлан ТІЛЕУІМБЕТОВ, Джиу-джитсудан еңбек сіңірген спорт шебері:
Сайлаудың маңызы жоғары. Сондықтан дауыс беруге келдік. Халық қамын ойлайтын депутат таңдалады деп сенеміз. Халық сенім артқан депутаттар адал жұмыс істесе, сайлауалды бағдарламасын түгел орындаса екен. Мінеки, сол уақытта іс өнеді.
Сайлаушылардың үдесінен шығу маңызды. Депутат тек қана халыққа қызмет жасауы керек. Дәп қазіргі сәтте елдің мүддесі бәрінен биік тұруы тиіс.
Бүгінде спортшылар да Парламентке үміткер болуда. Солар да өтіп, спортты қаржыландыру, бұқаралық спортты дамыту саласына ден қойса екен. Өз салам бойынша ой қозғайын. Жарыстарға шығу, бапкердің жалақысы, спорт кешендерін салу жағын қолға алу қажет. Бұл тараптан істелініп жатқан ізгілікті істер баршылық. Осыны тоқтатпай, спорт саласын дамытса деген тілегіміз бар. Сол мақсатпен осы сайлауға атсалысып, таңдауымызды жасадық.