Алматы әкімі Қытай Эксимбанкінің вице-президентімен инвестицияларды талқылады
Алматы әкімі Ерболат Досаев Қытайдың экспорттық-импорттық банкінің (Эксимбанк) вице-президенті Ян Дуннин бастаған делегациямен кездесу өткізді. Кездесуде инфрақұрылымдық және жасыл жобаларды дамыту, қаржы нарығын кеңейту, сауда-экономикалық байланыстарды тереңдету және туристік ынтымақтастықты арттыру мәселелері талқыланды, деп хабарлайды aqshamnews.kz
Негізгі талқыланған жобалар арасында көлік инфрақұрылымын жақсарту (жаңа метро желілерін салу), экономиканы әртараптандыру үшін жаңа индустриялық жобаларды жүзеге асыру, қалдықтарды қайта өңдеу зауытын салу секілді жасыл жобаларды іске асыру және туризмді дамыту бар.
2024 жыл Қытайдағы Қазақстан туризмі жылы, ал 2025 жыл Қазақстандағы Қытай туризмі жылы ретінде жарияланғаны атап өтілді. Биылғы жылдың бірінші жартысында Алматыға Қытайдан 40 мыңнан астам турист келді, бұл өткен жылдың сәйкес кезеңімен салыстырғанда 68%-ға көп.
Сонымен қатар, Алматының шетелдік инвестицияларды тарту саласындағы рөлі талқыланды. Ағымдағы жылдың алғашқы жартысында қала 3,8 млрд АҚШ доллары көлемінде тікелей шетелдік инвестициялар тартты. Алматы мен Қытай арасындағы тауар айналымы 2024 жылдың 9 айында 5,6 млрд АҚШ долларын құрады, бұл Қытай мен Қазақстан арасындағы жалпы тауар айналымының 28,9%-ын құрайды.
Ян Дуннин ханым жылы қабылдағаны үшін алғысын білдіріп, Эксимбанктің Алматыны тұрақты дамытуға бағытталған бастамаларды қолдауға дайын екенін атап өтті.
Тараптар индустрияландыруды, көлік инфрақұрылымын, қаржы нарығын және Алматының туристік әлеуетін дамыту шеңберінде жемісті ынтымақтастықты жалғастыру ниетін растады.