Әл-Фараби атындағы Қазақ ұлттық университетінің «Қаржы және есеп» кафедрасының меңгерушісі, экономика ғылымдарының кандидаты Ғалымжан Керімбек Мемлекет басшысы Қасым-Жомарт Тоқаевтың Үкіметтің кеңейтілген отырысында айтқан тапсырмаларына пікір білдірді.
Ұзақ емес, қысқа мерзімді жоспарлау:
Экономистің айтуынша, бүгінгі экономикада қысқа мерзімді жоспарлау әлдеқайда тиімді.
– «Ұзақ мерзімді жоспарлаудан гөрі, тоқсан сайын, жартыжылдық немесе бір жылдық жол карталарын әзірлеп, нақты қадамдарды анықтап жұмыс істеген дұрыс. Бұл жоспарлардың іске асуын бақылауды жеңілдетеді және тиімділікті арттырады», – деді ол.
Орынсыз шығындарды азайту:
Ғалымжан Керімбек Президенттің орынсыз шығындарды қысқарту жөніндегі тапсырмасын ерекше атап өтті.
– «Атқарушы органдар қажеті жоқ шығындарға қаражат жұмсауды тоқтатуы керек. Оның орнына, халыққа нақты пайда әкелетін жобаларды қолға алғаны жөн. Конференциялар мен жиындардың санын азайтып, оларды негізінен онлайн форматта өткізу арқылы бюджет қаражатын үнемдеуге болады», – деп атап өтті экономист.
Екінші деңгейлі банктердің рөлі:
Сарапшы Президенттің екінші деңгейлі банктерге қатысты бастамасын қолдады.
– «Банктер кезінде мемлекеттен үлкен қолдау көрді. Енді олар шаруа қожалықтары мен шағын және орта кәсіпорындарға, әсіресе өнім өндіру мен қызмет көрсету салаларында жұмыс істейтін субъектілерге көмектесуі керек. Бұл қысқа мерзімді төмен пайызбен несие беру сияқты нақты қолдау шаралары арқылы жүзеге асуы мүмкін», – деді Керімбек.
Ғалымжан Керімбектің пікірінше, осы бағыттағы реформалар Қазақстан экономикасының тұрақтылығы мен халықтың әл-ауқатын арттыруға үлкен үлес қосады.