«Шымбұлақ» тау курортында алғаш рет EcoDay экофестивалі өтті.
Бір күндік шараның мақсаты – тұрақты өмір салтын насихаттап, қонақтарға табиғатты қорғаудың маңызын іс жүзінде көрсету.
Фестиваль «Шымбұлақ» курорты, Recycle Birge экологиялық қозғалысы және HelloEco – Қазақстандағы алғашқы zero waste дүкені бірігіп ұйымдастырды. Олар экологияны тек теория емес, нақты әрі қолжетімді әрекет ретінде көрсетуге тырысты.
Тәжірибе арқылы үйрену
EcoDay аясында келушілерге:
• қағаз бен пластикті қайта өңдеу,
• табиғи спрей жасау,
• пластиксіз күтім құралдарын пайдалану бойынша шеберлік сабақтары ұсынылды.
Сондай-ақ арнайы аймақтарда:
• Leave No Trace қағидаларымен (табиғатқа зиян келтірмей демалу),
• апсайклингпен (ескі заттарды жаңа пайдалы бұйымға айналдыру) танысты.
Қонақтар тапсырмаларды орындап, эко-сыйлықтар ұтып алды. Бұл олардың күнделікті әдеттеріне жаңа көзқараспен қарауына түрткі болды.
Shymbulak Outdoor ұйымы басшысының орынбасары Махамбет Абдуллаев EcoDay-дың тұрақты түрде өтетінін айтып, бұл бастама курорттың экологиялық даму бағытына толық сәйкес келетінін атап өтті.
Экология – бұл өмірді жеңілдету
HelloEco дүкенінің тең құрылтайшысы Дина Огай фестивальдегі сөзінде экологияның саналы таңдау екенін жеткізді:
«Экологиялық өмір сүру – бұл көп реттік заттарды қолдану, ойланып әрекет ету. Табиғатты қорғау үшін өмір салтыңды түбегейлі өзгертудің қажеті жоқ. Заманауи өмірмен қатар табиғатты да қорғауға болады».
Айта кетейік, HelloEco дүкені Алматының Самал ықшамауданында орналасқан. Мұнда азық-түлік, косметика, тұрмыстық химия және гигиена құралдарын пластиксіз сатып алуға болады.
Экологиялық білім – мәдениеттің іргетасы
Фестивальдің негізгі серіктестерінің бірі – Recycle Birge ұйымы. Оның тең құрылтайшысы, эколог Пакизат Сайлаубекова халықтың экологиялық сауатын арттыру басты мақсат екенін айтты:
«Қайта өңдеу, бір реттік заттардан бас тарту қиын емес. EcoDay аясында біз қалдықтарды дұрыс басқару туралы пайдалы ақпаратпен бөлістік. «Шымбұлақтың» бастамасын қолдаймыз және болашақта да бірге жұмыс істеуге дайынбыз».
Сондай-ақ Сайлаубекова әр адамның табиғат аясына шыққан кезде өзінен кейін қоқыс тастап кететінін еске салды.
«Қоқысты жинау, өсімдіктерді жұлмау сияқты қарапайым әрекеттердің өзі – үлкен маңызға ие. EcoDay сияқты шаралар бұл ойды түсінікті әрі шынайы жеткізуге көмектеседі», – деді ол.