Премьер-министр ауаға тарайтын зиянды қалдықтарды азайту жөнінде шаралар қабылдау және карбонды полигондар қалыптастыру үшін жағдай жасауды тапсырды, деп хабарлайды aqshamnews.kz
Үкімет отырысы барысында Премьер-министр Олжас Бектенов «Таза Қазақстан» республикалық акциясы аясында азаматтардың экологиялық мінез-құлқын қалыптастыру үшін жағдай жасаудың маңыздылығын атап өтті.
«Кез келген азамат еліміздің киелі табиғатын аялап, тұрғылықты жерін абаттандыруға өз үлесін қоса алады.
Ол үшін экологиялық мәдениет күнделікті өміріміздің ажырамас бөлігіне айналуға тиіс. Барлық мемлекеттік органдар, бизнес пен бүкіл қоғам болып осы жұмыстарға белсенді атсалысуымыз қажет», — деді Олжас Бектенов.
Көміртегі бейтараптығына қол жеткізу туралы Париж келісіміндегі міндеттемелерге сәйкес, ауаға тарайтын зиянды қалдықтарды азайту үшін тиімді шаралар қабылдау қажеттігі атап өтілді. Осыған байланысты Экология және табиғи ресурстар министрлігіне әкімдіктермен бірлесіп, қоршаған ортаға эмиссияларды бақылаудың автоматтандырылған жүйелерін енгізуді жедел аяқтау тапсырылды.
Премьер-министр қоршаған ортаға, әсіресе кәсіпорындар айналасында ауаға таралған зиянды газдарды азайтатын карбонды полигондар құру арқылы экожүйе қалыптастырудың маңыздылығына назар аударды. Мұндай жобаларды іске асыру үшін Экология және табиғи ресурстар министрлігіне заңнамалық түзетулер әзірлеу жөніндегі тапсырма берілді. Сонымен қатар Президенттің елді мекендерде ағаш отырғызу туралы тапсырмасын орындаудың маңызды екені атап өтілді.