«Таза Қазақстан» экологиялық акциясы Алматы қаласының Түрксіб ауданында кәсіпкерлердің қолдауымен жалғасын тапты. «Алюр Авто» компаниясы ауқымды іс-шараға белсенді қолдау көрсетіп, өз аумағында тазалық шараларын ұйымдастырды. Сондай-ақ, барлық кәсіпкерлерді игі іс-шараға атсалысуға шақырды.
Компанияның әкімшілік-шаруашылық қамтамасыз ету бөлімінің жетекшісі Бауыржан Алпысбаевтың айтуынша, бұл шара бір реттік емес, тұрақты түрде жалғасын табады.
– Бүгінгі акция барысында біз өзімізге тиесілі аумақты қоқыстан тазартып, аялдама кешенін және ғимараттардың қасбетін жудық. Сондай-ақ, жасыл желекті күтіп-баптау және абаттандыру жұмыстары да жүргізілуде. Біз бұл экологиялық бастаманы қолдап, қаламыздың тазалығына тұрақты түрде үлес қосуға дайынбыз. Барлық кәсіпкерлерді осы шараға қатысып, қаламыздың тазалығын сақтауға шақырамыз, – дейді Бауыржан Алпысбаев.
Бұл бастама Алматы қаласы әкімдігінің абаттандыру паспортына сәйкес жүзеге асырылуда. Яғни әрбір шағын және орта бизнес өкілі өз аумағын таза ұстауға, жылына кемінде екі рет – көктемде және күзде сенбілік ұйымдастыруға міндетті.
Түрксіб ауданы әкімінің аппаратының кәсіпкерлікті және өнеркәсіпті дамыту бөлімінің бас маманы Ердос Әубәкіровтің айтуынша, мұндай іс-шаралар ауданның санитарлық жағдайын жақсартып қана қоймай, қала тұрғындары мен қонақтары үшін қолайлы орта қалыптастыруға да ықпал етеді.
– Кәсіпкерлердің осындай экологиялық бастамаларға белсене атсалысуы – қала экологиясын жақсартудың маңызды қадамы. Ауданымыздағы әрбір кәсіпкер өзіне тиесілі аумақтың тазалығына жауапкершілікпен қарауы тиіс. Бұл – тек санитарлық талап қана емес, сондай-ақ қала мәдениетінің көрсеткіші, – дейді Ердос Әубәкіров.
Бүгінде акция аясында қоқыс шығару, аумақты көгалдандыру және санитарлық тазарту жұмыстары белсенді түрде жүргізілуде. Ұйымдастырушылар бұл іс-шараның тұрақты түрде өткізіліп тұратынын атап өтті.